अध्यक्षद्वय पुनः संवादमा

admin

काठमाडौं, १६ असोज : नेपाल कम्युनिस्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले दुई दिनको मौनता तोड्दै शुक्रबार भेटवार्तालाई पुनः निरन्तरता दिएका छन् । मन्त्रिपरिषद् पुनर्गठन र राजदूत नियुक्तिबारे छलफल गर्न भेटवार्ता भएको हो ।

मन्त्रिपरिषद पुनर्गठनबारे कुरा नमिल्दा उनीहरुबीच मंगलबारपछि भेटवार्ता हुन सकेको थिएन । प्रधानमन्त्रीको सरकारी निवास बालुवाटारमा भेटवार्ता भएको अध्यक्ष दाहालका प्रेस संयोजक विष्णु सापकोटा ‘जुगल’ ले जानकारी दिएका छन् ।

मन्त्रिपरिषद पुनर्गठनमा कुरा मिल्न नसकिरहेका बेला बिहीबार सरकारले पार्टीसँग छलफल र परामर्श नै नगरी तीन देशका राजदुत नियुक्तिका लागि सिफरिस र मुख्यसचिव नियुक्त गरेपछि नेताहरुमा फेरि खटपट सुरु भएको छ ।

शुक्रबारको भेटमा अध्यक्ष दाहालले पार्टीसँग छलफल नै नगरी राजदूत नियुक्तिको सिफारिस गरेकोबारे ओलीसँग प्रश्न गर्ने एक सचिवालय सदस्यले जानकारी दिए । प्रधानमन्त्री समेत रहेका ओली अहिलेको मन्त्रिमण्डलमा रहेका धेरैजसो मन्त्रिहरुलाई निरन्तरता दिनुपर्ने पक्षमा छन् भने अर्का अध्यक्ष दाहाल अपवादबाहेक सबै मन्त्रीलाई हटाउने र दोहोर्‍याउन परे हटाएर मात्र पुनः नियुक्ति दिनुपर्ने पक्षमा छन् ।

गत भदौ २६ गते सम्पन्न स्थायी समिति बैठक र असोज ४ गते सम्पन्न सचिवालय बैठकले मन्त्रिपरिषद पुनर्गठन गर्ने निर्णय गरेको थियो । दुवै बैठकले अध्यक्षद्वयको सहमतिका आधारमा मापदण्ड तय गर्ने र सोही आधारमा नयाँ मन्त्री छनोट गर्ने टुुंगो लगाएको थियो । त्यसपछि मापदण्डबारे छलफल गर्न जुटेका ओली र दाहालले अडान नछोड्दा पुनर्गठनमा ढिलाई हुदै आएको छ ।

प्रतिक्रिया