justnep single

उखु किसानले आफ्नो धारणा सरकारलाई पठाउँदै, जवाफ अनुसार आन्दोलनलाई अघि बढाउने

admin

काठमाडौं, ९ पुस : आन्दोलनरत उखु किसानले सहमतिको लागि बिहीबार सरकारलाई आफ्नो धारणा पठाउने भएका छन् । उखुको बक्यौता रकम माग गर्दै १२ दिनदेखि काठमाडौंको माइतीघर मण्डलामा आन्दोलन गरिरहेका किसानले उद्योग मन्त्रालयलाई आफ्नो धारणा पठाउने भएका हुन् ।

भुक्तानीको सुनिश्चिततासहित सरकारले सहमतिको लागि बोलाए वार्तामा जाने उखु किसान संघर्ष समितिका संयोजक राकेश मिश्रले बताए । बिहीबार मन्त्रालयलाई आफूहरुको धारणा पठाउने र सरकारको जवाफ कस्तो आउँछ त्यहीअनुसार आन्दोलनलाई अघि बढाउने पनि उनले बताए ।

भुक्तानी सुनिश्चितताका लागि किसानहरुले अहिले धारणा तय गर्दैछन् । यसअघि २०७६ पुस १८ गते उखु किसानसँग भुक्तानी दिने सहमति गरे पनि एक वर्ष बितिसक्दा समेत किसानले अझै उखुको पैसा पाएका छैनन् ।

आन्दोलनरत किसानले यसअघि राज्य कोषबाट किसानलाई तत्काल भुक्तानी दिन र उद्योगीबाट ब्याजसहित असुल उपर गर्न सरकारलाई आग्रह गरेका थिए । पछिल्लो राजनीतिक घटनाक्रमले उखु किसानको आन्दोलन छायामा परेको छ । 

प्रतिक्रिया