काठमाडौं, ५ असोज : लगातार चार दिनसम्म घटेको शेयर बजार परिसूचक नेप्से मंगलबार भने बढेको छ । नेप्से १३ दशमलव ८३ अङ्कले बढेर दुई हजार सात सय १२ दशमलव शून्य सात विन्दुमा पुगेको छ । बैंक, होटल, विकास बैंक, जलविद्युत्, बीमा, माइक्रोफाइनान्स र अन्य समूहको शेयर बढेको छ ।
मंगलबार दिनभर नेप्सेमा उतारचढाव रह्यो । कारोबार सुरु भएको २७ मिनेटमा नै नेप्से ८२ अङ्कले घटेर २६ सय १६ विन्दुमा झरेको थियो । तर एकै छिनमा अर्थात् ११ बजेर ५७ मिनेटमा ६८ अङ्कले बढेको नेप्से फेरि ३१ अङ्कले ओरालो लाग्यो । त्यसपछि बिस्तारै उकालो लाग्न थालेको नेप्से बन्द हुने बेलामा भने झन्डै १४ अङ्कले बढेको हो ।
यस्तै मंगलबार कारोबार रकम पनि बढेको छ । दुई सय २३ कम्पनीका एक करोड ५३ लाख कित्ता शेयर सात अर्ब ३६ करोड ४७ लाख रुपैयाँमा कारोबार भएका छन् । सबैभन्दा धेरै अरुण भ्याली हाइड्रोको २५ करोड ४४ लाख रुपैयाँको शेयर किनबेच भएको छ । मंगलबार मनकामना स्मार्ट लघुवित्तको शेयर सबैभन्दा धेरै १० प्रतिशतले बढेको छ । एक्सेल विकास बैंक र जानकी फाइनान्सको शेयर भने साढे तीन प्रतिशतले घटेको छ ।