काठमाडौं, १२ फागुन : शेयर बजार परिसूचक नेप्से बुधबार सामान्य बढेको छ । नेप्से १२ दशमलव ५६ अङ्कले बढेर २५ सय ९९ दशमलव शून्य सात विन्दुमा पुगेको छ । बुधबार जलविद्युत् र अन्य समूहको बाहेक अरू सबैजसो समूहको शेयर बढेको छ ।
बैंकिङ समूहको शेयर १५ अङ्कले, व्यापारको साढे एक, होटलको साढे ४६, विकास बैंकको १८, फाइनान्सको ६, निर्जीवन बीमाको एक सय ८४, उत्पादनको ५४, माइक्रो फाइनान्सको २२ र जीवन बीमा समूहको शेयर एक सय ८० अङ्कले बढेको छ ।
दुई सय चार कम्पनीका एक करोड ६७ लाख कित्ता शेयर ६ अर्ब ७० करोड रुपैयाँमा कारोबार भएको छ । सबैभन्दा धेरै नेपाल बैंकको ८२ करोड र निफ्राको ५६ करोड रुपैयाँको शेयर किनबेच भएको छ ।
निफ्राको शेयर कारोबारमा दिउँसो केहीबेर समस्या आएको थियो । आईएमई जनरल इन्स्योरेन्सका लगानीकर्ताले सबैभन्दा धेरै १० प्रतिशत कमाएका छन् । निफ्राका शेयरधनीले पाँच प्रतिशतभन्दा धेरै गुमाएका छन् ।