काठमाडौं, १६ पुस: सरकारले घर भाडामा दिने घरबेटी मार्फत भाडामा बस्नेहरुको विवरण खोज्ने तयारी गरेको छ । पछिल्लो समय राजधानी काठमाडौंसहित देशका मुख्य शहरी क्षेत्रमा भाडामा बस्नेहरु मार्फत आपराधिक गतिविधि बढेको निश्कर्षसहित सरकारले घरबेटीमार्फत नै घर भाडामा लिएर बस्नेहरुको विवरण खोज्ने तयारी गरेको हो ।
गृहमन्त्री रामबहादुर थापाको अध्यक्षतामा मंगलबार गृह मन्त्रालयमा बसेको बैठकमा सो बारे छलफल भएको हो । गृहसचिव प्रेमकुमार राई र प्रहरी महानिरीक्षक सर्वेन्द्र खनालसमेत सहभागी बैठकमा गृहमन्त्री थापाले राजधानीसहित शहरी क्षेत्रमा आपराधिक गतिविधि बढेको विषयमा सरकारको ध्यानाकर्षण भएको बताएका थिए ।
‘सहरी क्षेत्रमा घरभाडा लिएर विभिन्न व्यक्ति र समूहले आपराधिक गतिविधि गरिरहेको र पछिल्लो समय गतिविधि बढेको विषयमा बैठकमा छलफल भयो, अब घरबेटी मार्फत भाडामा बस्नेहरुको विवरण राख्नेतर्फ तयारी अघि बढाउन भनिएको छ,’ गृह मन्त्रालयका प्रवक्ता केदारनाथ शर्माले राजधानीसँग भने ।
विवरणमा घरभाडामा दिँदा र लिँदा भाडामा बस्ने व्यक्ति, संस्था, कार्यालयको परिचय खुल्ने कागजातसहित फोन नम्बर समेत भएको विस्तृत विवरण एवं घर छाडेको भए सोको समेत विवरण समेत नजिकको स्थानीय प्रहरी कार्यालयमा घरबेटीले दिनु पर्ने छ ।
काठमाडौंका प्रमुख जिल्ला अधिकारी जनकराज दाहालले घरमा भाडामा बस्नेहरुको विवरण अद्यावधिक गरी राख्नेतर्फ आवश्यक प्रक्रिया सुरु गरिसकिएको बताए । गृहले समेत घरबेटीसँग समन्वय गरी अघि बढ्न प्रहरीलाई आवश्यक कदम चाल्न निर्देशन गरिसकेको छ ।
सरकारले पछिल्लो समय चिनियाँ नागरिकहरु घर नै भाडामा लिएर अपराधजन्य गतिविधि संचालन गरेको पाइएपछि यस्तो कदम चाल्न लागेको हो । बढी भाडा आउने देखेर घरबेटीहरुले चिनजान नभएका व्यक्ति वा संस्थाहरुलाई घर भाडामा दिंदा आफ्नो घरमा कहाँको कस्तो व्यक्ति बसेको छ वा कुन प्रकारको कार्यालय राखिएको छ भन्ने समेत जानकारी नहुने गरेकाले गृहले यथेष्ट प्रमाणका लागि समेत यस्तो निर्देशन गरिएको बताएको छ ।
घरमा भाडामा बस्नेहरुको विवरण हुँदा आपराधिक गतिविधिहरू चोरी, डकैती, लुटपाट, बैंकिङ कसुरजस्ता आर्थिक अपराध, साइबर अपराध, यौनजन्य क्रियाकलाप तथा विस्फोटक पदार्थहरूको भण्डारण र प्रयोग जस्ता गतिविधि नियन्त्रणमा आउने र मुलुकको समग्र शान्ति सुरक्षाको अवस्था नियन्त्रणमा आउने लक्ष्य गृहको छ । राजधानी दैनिकले खबर छापेकाे छ ।