काठमाडौं, १२ फागुन : नेपाल कम्युनिस्ट पार्टी (नेकपा) को प्रचण्ड-नेपाल समूहकी स्थायी कमिटी सदस्य पम्फा भुसालले प्रधानमन्त्री केपी शर्मा ओलीले राजीनामा नदिए १३ दिनभित्र बस्ने प्रतिनिधि सभाबाट निकाल्ने चेतावनी दिएकी छिन् । नेकपा प्रचण्ड–नेपाल समूहले बुधबार राजधानीमा निकालेको विजय सभालाई सम्बोधन गर्दै नेतृ भुसालले नैतिकता र मानवीय स्वाभिमान छ भने प्रधानमन्त्रीले तत्काल राजीनामा दिनुपर्ने बताइन् ।
सर्वोच्च अदालतले निर्णय गर्नेबित्तिकै राजीनामा आउनुपर्नेमा अहिलेसम्म राजीनामा नआएको भन्दै नैतिकताको आधारमा राजीनामा नदिए १३ दिनभित्र बस्ने प्रतिनिधि सभाबाट गलह’त्याएर निकाल्ने उनले चेतावनी दिएकी हुन् ।
उनले भनिन्, ‘हारेको प्रतिगामीले उठ्छु भन्ने परिकल्पना गरेको छ भने त्यो दुस्वप्न हुनेछ । तेह्र दिनभित्र प्रतिनिधि सभाको बैठक बस्ने छ र त्यहाँबाट गलह’त्याएर फालिने छ । म अहिले पनि अपिल गर्छु यो संविधानको हत्या गर्ने र संविधानको संरक्षण गर्न नसक्नेहरूले छिटो भन्दा छिटो ठाउँ खाली गरिदिएर आफूले गरेको अपराधप्रति पश्चाताप गरेर कतै बसिदिए हुन्छ ।’
नेतृ भुसालले राष्ट्रपति विद्यादेवी भण्डारीलाई समेत राजीनामा दिन आग्रह गरेकी हुन् । ‘बिहान पशुपतिनाथको जात्रा देखेको थिएँ मैले । त्यहाँ क्षमायाचना गर्नुभन्दा अब नागरिकका बीचमा क्षमायाचना गरेर हामीले छोड्यौँ भनेर फैसला गरे हुन्छ ।’
प्रधानमन्त्री ओलीले संविधानको ह’त्या गर्ने र राष्ट्रपति निकायबाट त्यही रगतको टीका लगाउने काम भएको टिप्पणीसमेत नेतृ भुसालले गरिन् । तर सर्वोच्च अदालतले निर्णय गरेपछि राजीनामा आउनुपर्नेमा प्रवक्तामार्फत राजीनामा नदिने भन्न लगाएको उनले बताइन् ।
राष्ट्रपतिले संविधानको रक्षा गर्न नसकेको पनि उनको भनाइ छ । नेतृ भुसालले नागरिकको अधिकारलाई सुरक्षा गर्न, संविधान र लोकतान्त्रिक गणतन्त्रको रक्षा गर्न सर्वोच्च अदालतले खेलेको भूमिकाको प्रशंसा गरिन् ।
नेतृ भुसालले भनिन्, ‘केपी ओलीले संविधानको ह’त्या गर्ने, राष्ट्रपति निकायले त्यही रगतको टीका लगाउने । संविधानको रक्षा गर्न नसक्ने असक्षमहरूको प्रतिगामीहरूले कमसेकम अलिकति पनि नैतिकता छ भने, अलिकति मानवीय स्वाभिमान छ भने मैले हिजै राजीनामा देलान् भनेको थिए तर एक/दुई घण्टापछि उनैका प्रवक्ताद्वारा सुने, नदिने रे ।’