ताप्लेजुङ, १४ असोज: भारतको सिक्किमका ६२ वर्षीय नरबहादुर प्रधानलाई सोमबार स्थानीय युगल लिम्बूले पिठ्युमा बोकेर प्रसिद्ध तीर्थस्थल पाथीभरा मन्दिरसम्म पु¥याउनुभयो । पाथीभरा क्षेत्रमा पर्ने काफ्लेपाटीदेखि झण्डै तीन घण्टाको पैदल दूरीमा पर्ने मन्दिरमा पु¥याएर दर्शन गराई पुनः काफ्लेपाटीसम्म ल्याइदिनुभयो ।
पाको उमेरका कारण हिमाली क्षेत्रको उकालो बाटो हिँड्न नसक्ने अवस्थाका प्रधानले हिँड्न नसक्दा कसैले बोकेरै मन्दिरमा पु¥याइदिन्छन् भन्ने कल्पनासमेत गर्नुभएको थिएन । जब सवारी साधनमा काफ्लेपाटीमा पुगेर ओर्लिएपछि यताउति मान्छे बोक्ने भरिया पहेँलो पोशाकमा देख्दा आफूलाई बोकाएरै मन्दिरमा पुग्ने निधो गरेर युगलको पिठ्युमा चढ्नुभयो । उहाँ मात्रै होइन, उहाँजस्तै हिँड्न नसक्ने वृद्धवृद्धा र बालबालिका पिठ्युमा आफूलाई बोकाएर मन्दिरको दर्शन गरी फर्किने गरेका छन् ।
पाथीभरामा अहिले दर्शनार्थीको मात्रै नभई हिँड्न नसक्नेलाई बोकेरै ओहोरदोहोर गराउनेको पनि घुइँचो छ । दशैँका बेला दर्शनार्थीको घुइँचो लाग्ने भएकाले पहँेलो पोशाकसहित स्थानीयवासी दर्शनार्थी बोक्न पाथीभरा क्षेत्रमा खटिएका छन् । उनीहरुले हिँड्न नसक्नेलाई भाडा लिएर बोकेर लैजाने ल्याउने गर्छन् । दुई वर्षअघि स्थानीय होटल व्यवसायी र सुरक्षा निकायले छलफल गरी हिँड्न नसक्ने यात्रुलाई बोकेर लैजान ल्याउने सकिने गरी व्यवस्थापन मिलाएको थियो ।
त्यसअनुसार ३० देखि ६० किलोसम्मका व्यक्तिलाई रु छ हजार, १५ देखि ३० किलोसम्मका व्यक्तिलाई रु तीन हजार र ६० किलोमाथिका व्यक्तिलाई अनुकूल दुवै पक्षको समझदारीअनुरुप भाडा लिई लैजाने ल्याउने गरिएको पाथीभरा क्षेत्र विकास समितिका सदस्य इन्द्रनारायण भट्टराईले बताउनुभयो । उहाँका अनुसार यो सेवा भरपर्दो तथा सुरक्षित बनाउन प्रहरी र होटल व्यवसायीले मिलेर निगरानी गर्ने गर्छन् । जाँदा–आउँदा फेदीमा रहेको प्रहरी चौकीमा समेत रेकर्ड राखिन्छ ।
पाथीभरा मन्दिर पुग्न सवारी साधनमा काफ्लेपाटीसम्म र त्यहाँदेखि माथि झण्डै तीन घण्टा बढी समय लाग्ने उकालो बाटो हिँड्नुपर्छ । पाथीभरा मन्दिर तीन हजार ७९४ मिटरको उचाइमा रहेकाले उच्च क्षेत्रको उकालो चढ्न बालबालिका र वृद्धवृद्धालाई सामान्य कठिन हुन्छ । यसरी उकालो चढ्न कठिनमा पर्ने वृद्धवृद्धा र बालबालिकालाई भाडामा बोकेरै पाथीभरा मन्दिरसम्म लैजाने ल्याउने कार्यका लागि केही वर्ष अघिदेखि नै पाथीभरा मन्दिर क्षेत्रमा भरियाहरु पुग्ने गरेका हुन् । अहिले त्यस क्षेत्रमा दुई सय बढी भरिया छन् । उनीहरु सबैले नम्बरसहितका पहेँलो पोशाक लगाएका छन् ।
पाथीभरा मन्दिरमा नौरथा लागेसँगै दर्शनार्थीको घुइँचो छ । वर्षका बाह्रै महीनामा दर्शनार्थी पुग्ने पाथीभरामा विशेषगरी दशैँका बेला सबैभन्दा धेरै दर्शनार्थी पुग्ने गरेका छन् । वार्षिक चार लाख बढी दर्शनार्थी मन्दिरमा आउने गरेका पाथीभरादेवी मन्दिर क्षेत्र संरक्षण तथा संवद्र्धन समितिका संरक्षक सदस्य रणबहादुर कार्कीले बताउनुभयो । नेपालका विभिन्न जिल्लाका साथै भारतको सिक्किम, दार्जलिङ, आसामलगायतका ठाउँबाट समेत दर्शनार्थी आउने गरेका छन् ।
दर्शनार्थीको सङ्ख्या बढ्दै गएपछि सहजरूपले पूजाआजा गर्नका लागि व्यवस्थापन मिलाइएको पाथीभरा क्षेत्र विकास समितिले जनाएको छ । दशैँको समयमा दर्शनार्थीको बाक्लो उपस्थितिलाई मध्यनजर गर्दै मन्दिरमा स्वयंसेवक परिचालन गरिएको छ भने तीनै तहका सुरक्षाकर्मीलाई समेत दर्शनार्थीको सुरक्षाका लागि खटाइएको जिल्ला प्रशासन कार्यालयले जनाएको छ ।