काठमाडाैं : विश्वमै सबैभन्दा लामो समय प्रधानमन्त्री पदमा आसिन बहराइनका प्रधानमन्त्री खलिफा बिन सल्मान अल खालिफाको निधन भएको छ। देशका राजकुमार समेत रहेका उनको ८४ वर्षको उमेरमा बुधबार निधन भएको सरकारी अधिकारीहरुले जानकारी दिएका छन्।
अमेरिकास्थित मायो क्लिनिकमा केही समयदेखि उपचार गराइरहेका उनको उपचारकै क्रममा निधन भएको हो। सानो अरबी मुलुक बहराइनका शक्तिशाली र अत्यन्त धनी व्यक्तिका रुपमा चिनिएका खलिफाको निजी टापु नै भएको र विदेशीहरुलाई उनले त्यहीँ भेट्ने गर्थे।
बहराइनका राजा शेख हमाद बिन इसा अल खलिफाले उनको शोकमा एक हप्ते राष्ट्रिय शोक घोषणा गरेका छन्। शोक अवधिमा राष्ट्रिय झण्डा आधा झुकाइने अधिकारीहरुले जानकारी दिएका छन्।
उनी सन् १९७० को आसपासदेखि अहिलेसम्म प्रधानमन्त्री थिए। सन् २०११ मा भ्रष्टाचारको आरोप लगाउँदै भएको आन्दोलनबाट हटाउने प्रयास हुँदा पनि उनी पदमै रहन सफल भएका थिए।