काठमाडौं, २३ फागुन : आइतबारको संसद् बैठकमा नेपाल कम्युनिस्ट पार्टी (नेकपा) को प्रचण्ड-नेपाल समूहका सांसद पनि सत्तापक्षकै लहरमा बस्ने भएका छन् । दुई समूहमा विभाजित भएर संसदीय दलका नेता र सचेतक पनि फरक-फरक बनाइसकेको अवस्थामा प्रचण्ड-नेपाल समूहका सांसद् कुन लहरमा बस्छन् ? भन्ने आम चासो थियो ।
तर, संसद् सचिवालयका प्रवक्ता डाक्टर रोजनाथ पाण्डेले पत्रकार सम्मेलन गरेर अहिलेसम्म पार्टी विभाजन भएको औपचारिक पत्र प्राप्त भइ नसकेकाले नेकपाका सबै सांसद् पहिलेकै स्थान अर्थात् सत्तापक्षकै लहरमा बस्ने जानकारी दिए ।
‘हामीले बुझ्दा नेकपा अहिलेसम्म एउटै पार्टी छ, कानुनी रूपमा दुई वटा भएको पत्र आएको छैन, त्यसैले पहिले उहाँहरू जुन ठाउँमा बस्नुहुन्थ्यो अहिले पनि त्यही लहरमै बस्नुहुन्छ’, पाण्डेले भने । प्रतिनिधि सभाको बैठक आइतबार चार बजे बस्दैछ ।
प्रधानमन्त्री केपी शर्मा ओलीको सिफारिसमा गएको पुस ५ गते राष्ट्रपतिले प्रतिनिधि सभा विघटन गरे पनि सर्वोच्चले फागुन ११ गते पुनर्स्थापनको फैसला गरेको थियो ।