सप्तरीका क्वारेन्टाइनमा एकसय २२ पुगे

राष्ट्रिय समाचार समिति

सप्तरी, १५ चैत : कोरोना भाइरस (कोभिड–१९) फैलिन नदिन एकान्तवासका लागि जिल्लाका विभिन्न स्थानमा बनाइएका क्वारेन्टाइनमा एक सय २२ जना पुगेका छन् ।भारतलगायत विदेशबाट आएका आठ महिलासहित १२२ जनालाई राखिएको स्वास्थ्य कार्यालयले जानकारी दिएको छ । कोरोना भाइरसको रोकथाम र नियन्त्रणका लागि जिल्लाका विभिन्न स्थानमा बनाइएका क्वारेन्टाइनमा विदेशबाट आएकाको खोजी गर्दै राख्न थालिएपछि सङ्ख्या थपिदै गएको हो ।

भारतीय खुला सीमामा रहेको जिल्लाका हनुमाननगर कंकालिनी नपा–११ स्थित सामुदायिक भवनमा एक महिलासहित १२, कञ्चनरुप नपा–८ स्थित सर्वोदय माविमा दुई महिला र एक पुरुष, वडा नम्बर–११ स्थित दुर्गा आधारभूत विद्यालय ठेलियामा चार पुरुष, वडा नम्बर–१२ स्थित शंकर माविमा तीन पुरुष, बोदे बर्साइन नगरपालिकास्थित जीवनदिप अस्पताल र जियालाल माविमा चार÷चार पुरुष, डाकनेश्वरी नगरपालिकास्थित कच मावि पातोमा चार पुरुष, खडक नगरपालिका–९ स्थित स्वास्थ्य चौकी मैना सहर्षबाहुमा दुई पुरुष र राजविराज नगरपालिका–२ स्थित साइकृष्ण मेडिकल कलेज एण्ड हस्पिटलमा एक महिलासहित १२ लाई राखिएको स्वास्थ्य कार्यालयले जनाएको छ ।

स्वास्थ्य कार्यालयका निमित्त प्रमुख दुनियालाल यादवका अनुसार बलान बिहुल गाउँपालिका–१ स्थित स्वास्थ्य चौकी मल्हनियामा छ पुरुष, छिन्नमस्ता गाउँपालिका–३ स्थित चौरसिया धर्मशालामा तीन महिलासहित १३, तिलाठी कोइलाडी गाउँपालिका–१ स्थित बृद्धाश्रममा आठ पुरुष र वडा नम्बर–८ स्थित लक्ष्मी बल्लभ नरसिंह माविमा चार पुरुष, अग्नीसाइर कृष्णसवरण गाउँपालिकास्थित जनचेतना मावि घोघिदाहामा एक महिलासहित १५, बिष्णुपुर गाउँपालिकास्थित जनता मावि बिष्णुपुर कट्टीमा नौ पुरुष, महादेवा गाउँपालिका–१ स्थित नरबहादुर थापा मावि पकरीमा सात पुरुष, राजगढ गाउँपालिकास्थित जसमावि नर्घोमा दुई पुरुष, तिरहुत गाउँपालिका–५ स्थित सरस्वती जनता मावि लोहजरामा चार पुरुष, रुपनी गाउँपालिका–४ स्थित जमुनी मधेपुरा माविमा दुई पुरुष र मावि तेरहौतामा चार पुरुषलाई राखिएको छ ।

आज बलान बिहुल गाउँपालिका–१ स्थित स्वास्थ्य चौकी मल्हनियाबाट एक महिलासहित १२ र अग्नीसाइर कृष्णसवरण गाउँपालिकास्थित जनचेतना मावि घोघिदाहाबाट एक पुरुषलाई घर पठाइएको छ । यसअघि शम्भुनाथ नगरपालिका–७ स्थित बुद्धिलाल बिद्या मुनर नमूना मावि भगवतपुरबाट पाँच पुरुष, राजगढ गाउँपालिकास्थित जसमावि नर्घोबाट तीन पुरुष र राजविराज नगरपालिका–२ स्थित साइकृष्ण मेडिकल कलेज एण्ड हस्पिटलबाट एक पुरुषलाई घर पठाइएको थियो ।

प्रतिक्रिया