काठमाडौं, ६ असोज : सिन्धुपाल्चोक र बाग्लुङलाई विपद्ग्रस्त क्षेत्र घोषणा गरी सरकारले पुनर्निर्माण गर्ने भएको छ ।
मंगलबारको मन्त्रिपरिषद् बैठकले यी दुई जिल्लालाई विपद्ग्रस्त क्षेत्र घोषणा गरेर नोक्सानको मूल्याङ्कन गरी पुनर्निर्माण गर्ने निणय गरेको सरकारका प्रवक्ता एवं परराष्ट्रमन्त्री प्रदीप ज्ञवालीले जानकारी दिएका छन् ।
यही असोज २४ गतेका लागि तय भएको निर्वाचन रोक्ने निर्णय सरकारले गरेको मन्त्री एवं सरकारका प्रवक्ता ज्ञवालीले बताए । यसैबीच सरकारले निजामती कर्मचारीको आधिकारिक ट्रेड युनियनको निर्वाचन रोक्ने निर्णय पनि गरेको छ ।
यसअघि प्रदेश २ का मुख्यमन्त्री लालबाबु राउतले कोरोना संक्रमणको समयमा चुनाव गर्न उपयुक्त नहुने भन्दै सङ्घीय मामिला तथा सामान्य प्रशासन मन्त्रालयलाई पत्र पठाएका थिए ।
यस्तै जेठ ३० गतेदेखि अहिलेसम्म प्राकृतिक विपदमा परेर देशभर अहिलेसम्म तीन सय ४० जनाको ज्यान गएको छ । ९९ जना अझै हराइरहेका छन् ।
विपदमा दुई सय ९८ जना घाइते भएका छन् । प्राकृतिक विपद्का कारण सबैभन्दा धेरै सिन्धुपाल्चोक र बाग्लुङ जिल्ला प्रभावित भएका छन् ।