काठमाडौं, १ फागुन : ‘उठौं, जागौं, हनुमन्ते नदी सफा गर्न लागौं’ भन्ने मूल नारासहित सुरु भएको हनुमन्ते नदी सफाई अभियान यही फागुन ४ गते ५१ औ हप्तामा प्रवेश गरेको छ ।
बुधबार हनुमन्ते नदी सफाई ५१ औ हप्ता मूल समारोह समितिले रिपोर्टर्स क्लब नेपालमा पत्रकार सम्मेलन गरेर देशकै नमूना बनेको भक्तपुरको हनुमन्ते सफाइ अभियानको ५१औँ हप्ता पूर्वप्रधानमन्त्री एवं नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ को प्रमुख आतिथ्यता र नेपाली कांग्रेसका नेता एवम् पूर्व उपप्रधानमन्त्री प्रकाशमान सिंहको विशिष्ट आतिथ्यतामा यही फागुन ४ गते भव्यरुपमा मनाइने जानकारी गराएको हो ।
भक्तपुर क्षेत्र नम्बर २ बाट निर्वाचित प्रतिनिधिसभाका सांसद एवं पूर्वउद्योगमन्त्री महेश बस्नेतको ‘सफा सुन्दर हराभरा भक्तपुर, सुरक्षित भक्तपुर, उज्यालो भक्तपुर र जाममुक्त भक्तपुर’ बनाउने लक्ष्यका साथ उनकै पहलमा सूर्यविनायक नगरपालिकाको संयोजकत्वमा शुरु भएको उक्त सफाइ अभियानले ५०औँ हप्ता पार गर्दा राज्यको विनालगानी देशकै नमूना सफाइ अभियानको रूपमा परिचित बन्न सफल भएको छ ।
कार्यक्रममा बोल्दै नेकपाका केन्द्रीय सदस्यसमेत रहेका सांसद महेश बस्नेतले सफाई अभियान झण्डै एक वर्षको यो अवधिमा आफूहरुले हनुमन्ते नदी सफाईको धेरै काम गरेको जनाए । उनले भने,‘हामीले अहिलेसम्म ७२ टन फोहोर उठायौं ।’ बस्नेतले विकासप्रतिको दृष्टिकोण नै परिवर्तन गर्न आवश्यक रहेको सुझाए । उनले भने,‘हामीले अब सरसफाई, सभ्यता, शिक्षाजस्ता विषयमा देशभरि अभियान नै चलाउनुपर्छ ।’ उनले राज्यको बिना लगानी यो अभियानलाई आज ५१ औं हप्तासम्म पुर्याउन सफल भएको पनि दाबी गरे । उनले भने,‘हामी डिजास्टरको अन्त्य र डेभलपमेन्टको सुरुवात गर्छौं ।’ त्यस्तै उनले आफूहरुले यो ५१ औं हप्ता भव्य रुपमा मनाउनुको अर्को कारण अहिले धमाधम निर्माण भएको हनुमन्ते कोरिडोरको कार्यप्रगति देखाउनुपनि रहेको सुनाए । बस्नेतले कोरिडोरको शिल्यान्यास गरेको दुई महिनाभित्रै बिना विवाद काम द्रुत गतिमा भैरहेको जनाए । उनले विकास निर्माणमा सबै राजनीतिक दलहरु मिलेर अघि बढ्नुपर्नेमा जोड दिए । उनले भने,‘त्यही भएर हामीले पर्सीको ५१ औं हप्ताको कार्यक्रममा प्रचण्ड र प्रकाशमानज्यूलाई बोलाएका हौं ।’बस्नेतले आफुहरुले सुरु गरेको अरनीको राजमार्ग सफाई अभियान पनि अहिले छोटो समयमै फलदायी भएको पनि विश्वास दिलाए । उनले भने,‘पछिल्लो यो दुई महिनाको अवधिलाई हेर्ने हो भने पनि दुर्घट्ना कम भएको छ। कोटेश्वरको जाम पनि कम भएको छ ।’ उनले आफूहरुले यो अभियानलाई देशकै अनुकरणीय अभियान बनाउन खोजेको स्पष्ट पारे । ५१ औं हप्ते कार्यक्रमको पूर्व सन्ध्यामा पर्सी शुक्रबार भक्तपुरमा घुम्ती शिविरको आयोजना गरिएको पनि उनले जानकारी दिए ।
१०० हप्ताको हनुमन्ते सफाइ अभियानले वाग्मतीको सहायक नदीको रुपमा बग्ने हनुमन्ते नदी सफाइ अभियानले अरनिको राजमार्गदेखि नगरपालिकाका वडावडामा समेत सफाइ अभियान सञ्चालन गर्न सफल भएको बस्नेतले विश्वास दिलाए ।
कार्यक्रममा रिपोर्टर्स क्लब नेपालका सभापति ऋषि धमलाले हनुमन्ते नदी सफाई अभियानमा सांसद बस्नेतको भूमिका स्वागतयोग्य र प्रशंसनीय रहेको बताउँदै यो अभियानमा क्लबको पूर्ण साथ र सहयोग रहने विश्वास दिलाए । धमलाले भक्तपुरको विकास र समृद्धिको लागि सांसद बस्नेत अहोरात्र खटिरहेको बताए । उनले भने,‘महेशजी बोलेको कुरा पूरा गर्ने नेतामा पर्नुहुन्छ । निर्वाचनको ताका म उहाँको क्षेत्रमा चुनावी साक्षात्कार गर्न गएको थिएँ । त्यतिवेलै उहाँले हनुमन्ते नदी सफाई अभियान चलाउँछु भनेर घोषणा गर्नुभएको थियो । आज उहाँले त्यो वाचा पूरा गर्नुभएको छ । उहाँ दिनरात भक्तपुरको विकासमा लाग्नुभएको कुरा मैले पाएको छु ।’ धमलाले सांसद बस्नेतको कामको खुलेर प्रशंसा गरेका थिए । उनले थपे,‘महेशजी भाषणमात्रै होईन, बोलेको कुरा व्यवहारमा उतार्ने नेतामा पर्नुहुन्छ । नेता भनेको त बोलेको कुरा पूरा गर्ने हुनुपर्छ ।’ फरक प्रसँगमा धमलाले समग्र देशमा नै सफाई अभियान चलाउनुपर्नेमा जोड दिएका थिए । उनले नेपाल सुन्दर र सफा भए विदेशी पर्यटकहरुले भरिभराउ हुने र नेपालको विकासमा यसले ठूलो टेवा पुग्नेपनि विश्वास दिलाए ।
हनुमन्ते नदी सफाई अभियानले सफलता प्राप्त गरेरै छोड्ने धमलाको भनाई छ । उनले अपिल गर्दै भने,‘सबैले यो पवित्र अभियानमा आ–आफ्नो ठाउँबाट सहयोग पुर्याउनुपर्छ ।’
यही फागुन ४ गते बिहान ७ बजे मध्यपुर अस्पतालको दक्षिणतर्फ रहेको मध्यपुरथिमि र सूर्यविनायक नगरपालिकाको सिमानास्थित हनुमन्ते नदीको पुलबाट सफाइ अभियान सञ्चालन गर्नुका साथै राष्ट्रिय धावक बैकुण्ठ मानन्धरको नेतृत्वमा वाकाथुनसमेत हुने आयोजक मूल समितिले जनाएको छ ।
वाकाथुनसँगै भक्तपुरको सल्लाघारीको आईल्याण्ड पिकमा नेपालको ठूलो झण्डा गाडेर झण्डोत्तोलनसमेत गरिने भएको छ ।
कार्यक्रममा सफाइ अभियानका संयोजक एवम् सूर्यविनायक नगरपालिकाका नगर प्रमुख वासुदेव थापाले हनुमन्ते सफाइ अभियानले नै अरनिको राजमार्ग सफाइ अभियानदेखि सम्पदा, मठमन्दिर सफाइ अभियान, गाउँटोल सफाइ अभियानसमेत सञ्चालन गर्दै आएको बताए ।
कार्यक्रममा हुनमन्ते नदी सफाई ५१ औं हप्ता तयारी मूल समारोह समितिका संयोजक मधु ढुङ्ेल, नवराज काफ्ले उक्त कार्यक्रमको बारेमा प्रकाश पारेका थिए ।
त्यस्तै कार्यक्रममा सफाई दुत बरिष्ठ निर्देशक मदन घिमिरेलगायतको उपस्थिति रहेको थियो । कार्यक्रममा अभियानका मिडिया कोअर्डिनेटर सुन्दर विष्टले प्रेस वक्तव्य वाचन गरेर सुनाएका थिए ।