दाङ, २० जेठ : दाङमा बस दुर्घटना हुँदा १० यात्रु घाइते भएका छन् । नारायणघाटबाट महेन्द्रनगरका लागि छुटेको ना ६ ख १२६४ नम्बरको बस लमही नगरपालिका वडा नम्बर ९ रिहार नजिक दुर्घटना हुँदा १० यात्रु घाइते भएका हुन् ।
घाइते मध्ये चारजनाको अबस्था गम्भीर रहेको जिल्ला प्रहरी कार्यालय दाङ्गले जानकारी दिएको छ । आइतबार राति करिब सवा १२ बजे रिहार नजिकै जंगलमा शाैचकाे लागि बस राेकिएकाे थियाे । तर राेकिएकाे अवस्थामा रहेकाे बस आफै गुडेर सडकबाट तल खस्दा दुर्घटना भएको हो ।
सामान्य घाइते भएका यात्रुहरुको लमहीमा उपचार भैरहेको छ भने गम्भीर घाइतेलाई उपचारका लागि बाँकेको नेपालगञ्ज लगिएको छ । गम्भीर घाइते हुनेमा टिकापुर ८ बस्ने वर्ष ६५ का भागीराम डगौरा, उनकी श्रीमती वर्ष ६० का बेज्या चौधरी, कैलाली लम्किचुहा ६ बस्ने वर्ष ३५ का कृष्ण भण्डारी र डडेल्धुरा अम्मरगढ़ी २ बस्ने वर्ष ५० का गोपा सार्की रहेका छन् ।