काठमाडौं, पुस १९ : अबको तीन दिनसम्म देशका केही ठाउँमा पानी पर्ने सम्भावना रहेको मौसमविद्ले बताएका छन् । पश्चिमी वायुको प्रभावले आउँदो तीन दिनसम्म देशका धेरैजसो ठाउँमा बादल लाग्ने र केही ठाउँमा आंशिकदेखि सामान्य वर्षाको सम्भावना रहेको मौसमविद् सजिना शाक्यले बताउनुभयो ।
उहाँकाअनुसार सुदूरपश्चिम, कर्णाली र गण्डकी प्रदेशका केही ठाउँहरुमा पानी पर्ने सम्भावना रहेको छ । यस्तै देशका सबैजसो उच्च पहाडी तथा हिमाली क्षेत्रमा हिउँ पर्ने मौसम पूर्वानुमान महाशाखाले जनाएको छ ।
पश्चिमी वायुको प्रभावले आउँदाे तीन दिन हिउँ पर्ने सम्भावना रहेको मौसमविद् शाक्यले बताउनुभयो । अहिले देशका धेरैजसो ठाउँमा सामान्यदेखि आंशिक रुपमा बादल लागेको छ भने तराईका जिल्लाहरुमा कुहिरो र हुस्सु लागेको छ ।
तराईको कुहिरो तथा हुस्सु भने दिउँसोपखबाट हटेर जाने महाशाखाले जनाएको छ । आज काठमाण्डौ उपत्यका हिजोभन्दा केही न्यानो महशुस भएको छ । हिजो १ दशमलव तीन डिग्री रहेको काठमाण्डौ उपत्यकाको न्यूनतम तापक्रम आज बढेर ३ डिग्रीमा पुगेको छ । काठमाण्डौ उपत्यकामा आज दिनभरजसो नै बादल लागे पनि तापक्रम भने बढ्दै जानेछ ।