काठमाडौं, २६ भदौ : नेपालमा पछिल्लो २४ घण्टामा ९ सय ९४ जनामा कोभिड–१९ संक्रमण भएको छ । ९ हजार ८ सय ४० जनामा गरिएको परीक्षणमा ९ सय ९४ जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ । काठमाडौं उपत्यकामा ३ सय ५७ जना संक्रमित थपिएका छन् । यो सँगै नेपालमा कोभिड संक्रमितको संख्या ८ लाख ६२ हजार ९ सय ४६ पुगेको छ ।
पछिल्लो २४ घण्टामा कोभिड संक्रमणबाट १२ जनाको मृत्यु भएसँगै कोभिडबाट अहिलेसम्म मृत्यु हुनेको संख्या १० हजार ९ सय ३६ पुगेको छ । देशभरबाट शनिबार १३ सय ६८ जना डिस्चार्ज हुँदा अहिलेसम्म संक्रमणमुक्त हुनेको संख्या ७ लाख ३८ हजार ३४ पुगेको छ । संक्रमितमध्ये ९५ प्रतिशत बिरामी निको भएर घर फर्किएको मन्त्रालयको तथ्याङ्कले जनाएको छ ।
देशभर २७ हजार ३ सय ५५ सक्रिय संक्रमित रहेको मन्त्रालयले जनाएको छ । जसमध्ये ४ सय ५६ जना आईसीयू, १ सय २२ जना भेन्टिलेटरमा उपचाररत छन् । बाँकी २५ हजार ७ सय ८ जना होम आइसोलेसन र १ हजार ६ सय ४७ जना संस्थागत आइसोलेसनमा छन् ।
देशभर कोभिडविरुद्धको पहिलो मात्रा खोप लगाउनेको संख्या ५७ लाख ६९ हजार ३ सय २८ र पूर्ण मात्रा खोप लगाउनेको संख्या ५१ लाख ६० हजार ५ सय २४ पुगेको मन्त्रालयले जनाएको छ ।