काठमाडौं, ८ असोज : राष्ट्रपति रामचन्द्र पौडेलले देशलाई मिलाएर अघि बढाउनुको बिकल्प नभएको बताउनुभएको छ ।
सोमबार जनकपुरधाममा आयोजित अभिनन्दन कार्यक्रममा राष्ट्रपति पौडेलले मुलुकको राष्ट्रियतालाई बलियो बनाउन देशलाई मिलाएर अघि बढाउनुको बिकल्प नभएको बताउनुभएको हो ।
राष्ट्रियतालाई बलियो बनाएर मात्रै मुलुकलाई समृद्ध बनाउन सकिने उहाले बताउनुभयो । संघ, प्रदेश र स्थानीय तहको अधिकार नमिलेको भन्दै उहाले यसलाई मिलाउन राजनीति दलहरू गम्भीर हुनुपर्ने धारणा राख्नुभयो ।
जनताको ठूलो बलिदानबाट प्राप्त भएको सङ्घीयतालाई मजबुत बनाउन आवश्यक पर्ने कानूनको निर्माणमा ढिलाइ हुन नहुने उहाले बताउनुभयो ।
उहाँले आफूले सबै धर्म, संस्कृति तथा परम्पराप्रति उत्तिकै सम्मान गरेर पदको गरिमा बढाउने प्रयास गरेको उल्लेख गर्नुभयो । कार्यक्रममा जनकपुरधाम उपमहानगरपालिकाले राष्ट्रपति पौडेललाई जनकपुरधाम बासीको तर्फबाट नागरिक अभिनन्दन गरेको थियो ।