काठमाडौं, ६ असाेज : नेपाली कांग्रेसको पदाधिकारी बैठक आज दिउँसो ३ बजे बस्दै छ । बैठक प्रधानमन्त्री तथा कांग्रेस सभापति शेरबहादुर देउवाको निजी निवास बूढानीलकण्ठमा बस्न लागेको हो ।
बैठकमा सरकारमा सहभागी हुने बाँकी मन्त्री छनोट गर्ने विषयमा छलफल हुने बताइएको छ । देउवा नेतृत्वमा सरकार बनेको दुई महिना भइसक्दा पनि अझै मन्त्रीपरिषद् विस्तार हुन सकेको छैन । मन्त्रीपरिषद् विस्तारमा ढिलाई हुँदा प्रधानमन्त्री देउवाको ओलोचना पनि भइरहेको छ ।
मंगलबार साँझ बसेको सत्ता गठबन्धनको बैठकले काँग्रेस नेता डा नारायण खड्कालाई परराष्ट्रमन्त्री बनाउने निर्णय गरिसकेको छ । यसअघि नै कांग्रेसबाट बालकृष्ण खाँण गृह र ज्ञानेन्द्रबहादुर कार्की कानूनमन्त्री र उमेश श्रेष्ठ स्वास्थ्य तथा जनसंख्या राज्यमन्त्री बनिसकेका छन् ।
आजको बैठकमा महाधिवेशनका बाँकी कामबारे छलफल गर्ने पनि बताइएको छ । महाधिवेशनअन्तर्गत वडा अधिवेशन हुन बाँकी जिल्लाको अधिवेशनको नयाँ मितिका बारेमा पनि आवश्यक निर्णय हुने बताइएको छ ।
प्रदेश नं २ का आठ जिल्ला तथा सुर्खेत, डोल्पा, रसुवा, रुपन्देही र कैलाली गरी १३ जिल्लाको पार्टीको क्रियाशील सदस्यता विवरण अझै सार्वजनिक हुन नसकेका कारण ती जिल्लामा यसअघिको वडा अधिवेशन कार्यतालिका प्रभावित भएको छ ।