justnep single

भोजभतेरमा सहभागी नै बढी संक्रमित, ‘दलका सभा-सम्मेलन पनि प्रमुख कारण’

राष्ट्रिय समाचार समिति

चितवन, २३ बैशाख : चितवनमा कोरोना भाइरसको संक्रमण भएका धेरैजसोले आफूलाई भोतभतेरबाट संक्रमण भएको आशङ्का गरेका छन् । स्वास्थ्य कार्यालय चितवन र भरतपुर महानगरपालिकाले गरिरहेको सर्वेक्षणमा धेरैजसो भोजभतेरमा गएकाहरू संक्रमित भेटिएका हुन् । गएको वर्षको चैतमा लकडाउन भएपछि त्यसयता विवाह, व्रतबन्ध, पूजाआजाजस्ता कार्यक्रम हुनसकेका थिएनन् । गएको फागुन ४ देखि यही बैशाख ५ गतेसम्म पनि शुक्रअन्ध भएका कारण शुभकार्य गर्न नहुने धार्मिक मान्यता थियो ।

लामो समयदेखि रोकिएका यस्ता कार्यक्रम बैशाख पहिलो हप्तापछि धमाधम भएका थिए । यस्ता कार्यक्रममा सहभागी नै बढी संक्रमित भएको प्रारम्भिक सर्वेक्षणले देखाएको छ । स्वास्थ्य कार्यालयका सूचना अधिकारी गीताञ्जली ढकालका अनुसार कार्यालयमा दुई कर्मचारीले यही बैशाख १६ गतेबाट संक्रमितलाई फोन गरिरहेका छन् । दैनिक ५० जना हाराहारीलाई फोन गर्दा धेरैजसोले विवाह, व्रतबन्ध, पूजाआजाजस्ता कार्यक्रमबाट फर्किएपछि आफू संक्रमित भएको बताएको जानकारी दिइन् ।

उनले भनिन्, ‘गएको वर्ष धेरैले अस्पताल आएर फर्किएपछि सङ्क्रमण भएको भन्थे, यस वर्ष भोजभतेरमा गएपछि संक्रमण भएको भनेका छन् ।’ टेलिफोनबाट सर्वेक्षण गर्ने कार्य जारी रहेकाले यकिन तथ्याङ्क भने आउन नसकेको उनको भनाइ थियो । बैशाखयता मात्रै चितवनमा एक हजारभन्दा बढी संक्रमित भइसकेका छन् । पछिल्ला दिनमा दैनिक दुई सयभन्दा बढी संक्रमित देखिएका छन् ।

महानगरपालिकाका कोभिड-१९ सम्पर्क व्यक्ति केशव भट्टले महानगरपालिकाले गरिरहेको सर्वेक्षणमा पनि धेरैजसोले विवाह, व्रतबन्ध, भोजभतेरमा सहभागी भएपछि संक्रमणमा परेको बताएको जानकारी दिए । कतिपयले जिल्लाबाहिर गएर आएपछि संक्रमणमा परेको पनि जनाएको उनले बताए । भट्टले भने, ‘धेरैजसोमा भोजभतेरबाटै सङ्क्रमण फैलिएको पाइयो ।’ महानगरपालिकाले पाँच समूह बनाएर वडा छुट्याएर संक्रमितसँग सम्पर्क गरिरहेको छ । दुई दिनदेखि महानगरले सम्पर्क कार्य थालेको हो ।

भरतपुर अस्पतालका अध्यक्ष डाक्टर भोजराज अधिकारीले विवाह, व्रतबन्ध, पूजापाठसँगै दलका कार्यक्रम पनि संक्रमण समुदायमा पुर्‍याउनमा जिम्मेवार रहेको देखिएको बताए । उनका अनुसार सरकारले गरेको निर्देशनलाई अवज्ञा गरेकै कारण यो अवस्था आएको हो । विवाहको लगन अघि सत्तापक्ष र विपक्षी सबै दलले आ-आफ्नो शक्ति प्रदर्शन गरेर देशैभर सभा र सम्मेलन गरेका थिए । ती कार्यक्रम पनि समुदायमा कोरोना पुर्‍याउन सहयोगी बनेको फिजिसियनसमेत रहेका डा. अधिकारीको बुझाइ छ । आम सर्वसाधारणले कोरोनालाई हल्का रूपमा लिँदा यो अवस्था सिर्जना भएको उनले बताए ।

स्वास्थ्य कार्यालयका प्रमुख दीपक तिवारी गएको फागुनदेखि नै सन्देश प्रवाह गरेर भोजभतेर, सभा-सम्मेलनमा २५ जनाभन्दा बढी सहभागी नहुन अनुरोध गरेको भए पनि अटेर गरिएका कारण संक्रमण धेरै फैलिएको बताउँछन् । उनले भने, ‘२५ जनालाई भन्दा मानिसले विभिन्न अर्थमा व्याख्या गरे, अहिले यो अवस्था सिर्जना भयो ।’ विवाहमा २५ जनाभन्दा बेहुलापट्टीका २५ र बेहुलीपट्टीका २५ भन्दै फरक-फरक व्याख्या गरेर सरकारले गरेको निर्देशन धेरैजसोले अटेर गरेका थिए । गएको वर्ष पनि यस्ता कार्य हुन नसकेकाले कोरोना सक्किइहाल्यो नि भन्दै धेरैले मन फुकाएर आफन्त डाक्ने गरेको तिवारीको भनाइ छ ।

पछिल्लो समयमा विगतकै तुलनामा विवाह, व्रतबन्ध धुमधामका साथ हुने गरेका थिए । यस्ता कार्यक्रममा विभिन्न जिल्ला र विदेशबाट आउनेसमेत सहभागी हुने गर्दथे । कतिपय भारतबाट समेत यस्ता कार्यक्रममा सहभागी हुन आएका थिए । जुन आज कोरोना फैलाउने माध्यम बनेको विज्ञहरू बताउँछन् । संक्रमण भयावह हुँदासमेत हिजोआज पनि लुकीछिपी यस्ता कार्यक्रम हुँदै आएका छन् । प्रशासनले घरमा परिवार मात्रै बसेर यस्ता कार्य गर्न भने पनि अटेर गरेर आफन्त बोलाउँदै कार्यक्रम गरिरहेको पाइन्छ ।

प्रतिक्रिया