बेनी, १४ असोज: नेपाली काङ्ग्रेसका केन्द्रीय सदस्य अर्जुननरसिंह केसीले प्रेसमाथि हस्तक्षेप नगर्न सरकारसँग आग्रह गर्नुभएको छ । नेपाल प्रेस युनियन म्याग्दीको सातौँ साधारणसभा तथा पाँचाँै अधिवेशनको आज यहाँ उद्घाटन गर्दै उहाँले स्वतन्त्र र निष्पक्षरुपमा पत्रकारिता गर्ने वातावरण सिर्जना गर्नेतर्फ सरकार गम्भीर हुनुपर्छ भन्नुभयो ।
नेता केसीले सामाजिक सञ्जाल नियन्त्रणका नाममा प्रेसमाथि नै अङ्कुश लगाउने काम गर्नु उपयुक्त होइन भन्दै आमसञ्चारमाध्यमले नेतामुखीभन्दा नीतिमुखी र व्यक्तिभन्दा पनि सही विचारलाई प्राथमिकता दिनुपर्नेमा जोड दिनुभयो । “नेपालमा लोकतन्त्र प्राप्तिको आन्दोलनमा पत्रकारको भूमिका महत्वपूर्ण थियो, अहिले सङ्घीय गणतन्त्रको रक्षाका लागि पत्रकार सशक्त हुनुपर्छ”, उहाँले भन्नुभयो ।
नेता केसीले स्थानीय, प्रदेश र सङ्घीय सरकारले करको सीमा निर्धारण नगर्दा जनतामा करको भार थपिएको उल्लेख गर्दै करको उपयोगलाई समेत हेक्का राख्न आग्रह गर्नुभयो । सो अवसरमा प्रेस युनियन म्याग्दीद्वारा स्थापित ‘प्रेस युनियन पत्रकारिता पुरस्कार–०७५’ बाट पत्रकार हरिकृष्ण गौतमलाई रु पाँच हजारसहित सम्मानपत्रद्वारा सम्मान गरियो ।
-रासस