काठमाडौं, २ चैत : पहिलेको नै सङ्क्रमित लामखुट्टेले पारेको अण्डाका कारण यो वर्ष चाँडै नै डे’ङ्गीको सङ्क्रमण देखिएको डाक्टरले बताएका छन् ।
यो वर्ष पानी परिरहेको र गएको वर्ष सङ्क्रमित भएको अण्डा पानीको सम्पर्कमा आएकाले मानिसमा चाँडै नै रोगको सङ्क्रमण देखा परेको इपिडिमियोलोजी तथा रोग नियन्त्रण महाशाखाले जनाएको छ ।
गएको वर्ष पनि डेङ्गी रोगको सङ्क्रमण देखिएको र यो वर्ष पनि चाँडै नै यसको लक्षण देखा परेकोले उच्च सतर्कता अपनाउनुपर्ने महाशाखाले जनाएको छ ।
एडिस एजेप्टाइ र एई अल्बोपिक्टस जातको पोथी लामखुट्टेको टोकाइबाट सर्ने डेङ्गी रोग अहिले प्रकोपको रुपमा देखिएको छ ।
पुसको दोस्रो हप्तादेखि गएको शुक्रबारसम्ममा ३६ जना डेङ्गीका बिरामी फेला परेको महाशाखाले जनाएको छ ।
लामखुट्टेको अण्डा एक वर्षसम्म नष्ट नहुने र पानीको सम्पर्कमा आउना साथ लार्भा उत्पादन हुने भएकोले यसले कुनै मौसम पर्खेर नबस्ने महाशाखाका वरिष्ठ स्वास्थ्य प्रशासक डाक्टर प्रकाशप्रसाद साहले बताए ।
सङ्क्रमणबाट बच्न नजिकै रहेका झाडीहरु नष्ट गर्न र खाल्डाखुल्डी पुर्न पनि उनले आग्रह गरेका छन् ।