एजेन्सी, २२ माघ : म्यानमारमा सैन्य ‘कू’ पछि त्यसको विरोधमा सुरु भएको चर्को विरोधका बीच सैन्य सरकारले फेसबुक चलाउन प्रतिबन्ध लगाएको छ । अधिकारीहरूका अनुसार म्यानमारमा निकै लोकप्रिय फेसबुक ‘स्थायित्व’ का लागि बन्द गरिएको हो ।
फेसबुक म्यानमारमा धेरै व्यक्तिका लागि इन्टरनेटसम्म पहुँच राख्ने एकमात्र प्लेटफर्म हो । सैन्य ‘कू’ का क्रममा पक्राउ परेकी निर्वाचित नेतृ आङ सान सू चीविरुद्ध कैयौँ आरोप लगाइएको छ । सेनाले सत्ता हातमा लिनुअघि निर्वाचित नेत्री आङ सान सू चीलाई पक्राउ गरेको थियो ।
संंयुक्त राष्ट्र सङ्घका महासचिव एन्टेनियो गुटेरसले म्यानमारमा भएको सैन्य ‘कू’ विफल पार्न विश्व समुदायसँग आह्वान गरेका छन् । म्यानमारका आधा जनसङ्ख्या पाँच करोड तीस लाखले फेसबुक चलाउँछन्, म्यानमारमा विना ‘लोडिङ’ तस्बिर र भिडियो निःशुल्क छ, जसका कारण म्यानमारमा फेसबुक इन्टरनेटको पर्याय बनेको छ ।
अभियन्ताहरुले बुधबार सैन्य ‘कू’ विरुद्ध सबैलाई समेट्न एक फेसबुक पेज बनाएका थिए । म्यानमारमा भएको सैन्य ‘कू’ को विश्वभरि नै विरोध भइरहेको छ । त्यहाँको सञ्चार तथा सूचना मन्त्रालयले सामाजिक सञ्जाल प्लेटफर्म आउँदो फेब्रुअरी ७ सम्म बन्द रहने जनाएको छ ।