काठमाडौं, २९ बैशाख : यो हप्ता नेपालमा कोराना भाइरसको संक्रमण झण्डै ५१ प्रतिशतले बढेको छ । स्वास्थ्य तथा जनसङ्ख्या मन्त्रालयका अनुसार ४४ वटा जिल्लामा कोरोना भाइरसको संक्रमण व्यापक रूपमा फैलिएको । प्रति लाख जनसङ्ख्यामा १०जनाभन्दा बढीमा संक्रमण भएको पाइए व्यापक रूपमा संक्रमण फैलिएको भनिन्छ ।
यस्तै भारतमा भन्दा नेपालमा अवस्था गम्भीर बन्दै गएको डाक्टरले बताएका छन् । दैनिक संक्रमित संख्याको आधारमा प्रति १० लाख जनसङ्ख्यामा नेपालमा तीन सय चार जनामा संक्रमण देखिएको छ भने भारतमा यो दर दुई सय ४० छ ।
यस्तै मृत्युदर पनि भारतमा भन्दा नेपालमा धेरै छ । भारतमा प्रति १० लाख जनसङ्ख्यामा दुई दशमलव ५ प्रतिशत छ भने नेपालमा तीन दशमलव ३ प्रतिशत छ । यसैगरी संक्रमितको संख्या भारतमा भन्दा नेपालमा दोब्बरले बढेको डाक्टर अर्चना श्रेष्ठले बताइन् ।
यसले नेपालको अवस्था भारतको भन्दा नाजुक रहेको देखिएको छ । डाक्टर श्रेष्ठले संक्रमितको अहिलेको अवस्थालाई हेर्दा समुदायमा यो भन्दा धेरै संक्रमित हुन सक्ने देखिएको बताइन् । कोरोनाको संक्रमण नेपालमा बढ्दै गएकाले संक्रमण दर घटाउन संक्रमितले विशेष ध्यान दिनुपर्ने उनको भनाइ छ ।
ज्वरो आए, खोकी लागे वा शरीर दुखे तुरुन्त स्वास्थ्य परीक्षण गराउन पनि डाक्टरको सुझाव छ । यस्तै कट्याक्ट ट्रेसिङमा परेकाहरूले पनि तुरुन्त परीक्षण गराउनु पर्ने डाक्टरको भनाइ छ । बेलैमा कन्ट्याक्ट ट्रेसिङ भएर परीक्षण भएमा ८५ प्रतिशत सङ्क्रमण फैलनबाट रोक्न सकिने डाक्टरले बताएका छन् ।