काठमाडौं, ७ साउन : नेपाली कांग्रेसका नेता गोपालमान श्रेष्ठले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेटवार्ता गरेका छन् । बिहीबार बिहान उनीहरूबीच करिब आधा घण्टा भेटवार्ता भएको हो । श्रेष्ठको सचिवालयले दिएको जानकारीअनुसार दाहालको पत्नीको स्वास्थ्य अवस्थाबारे जानकारी लिन श्रेष्ठ खुमलटार पुगेका थिए ।
लामो समयदेखि सीता दाहाल बिरामी छिन् । यसअघि नेपाली कांग्रेसका सभापतिसमेत रहेका प्रधानमन्त्री शेरबहादुर देउवा खुमलटार पुगेर सीताको स्वास्थ्य अवस्थाबारे जानकारी लिएका थिए । यस्तै दाहाल र श्रेष्ठबीच समसामयिक राजनीतिक घटनाक्रमबारे पनि कुराकानी भएको छ ।
यसैगरी गण्डकी प्रदेश सरकारमा मन्त्रिपरिषदलाई छिटो पूर्णता दिनेबारे पनि कुराकानी भएको श्रेष्ठको सचिवालयले जानकारी दिएको छ । कांग्रेस नेता श्रेष्ठ संगठन विभाग प्रमुख पनि हुन् । शेरबहादुर देउवा नेतृत्वको सरकारमा माओवादी केन्द्र पनि सामेल छ । देउवा नेतृत्वको सरकार दलहरूको गठबन्धनबाट बनेको हो । यो गठबन्धनलाई दीगो बनाउनेबारे पनि उनीहरूबीच छलफल भएको थियो ।