काठमाडौं, ४ असोज : सोमबार शेयर बजार एक सय १४ अङ्कले घटेको छ । बिहान बजार खुल्ने बित्तिकै ओरालो लागेको नेप्से बेला-बेला उतारचढाव हुँदै एक सय १४ दशमलव शून्य दुई अङ्कले घटेर दुई हजार ६ सय ९८ विन्दुमा झरेको हो । कारोबार भएका सबै समूहको शेयर घटेर राताम्मे भएको छ ।
यस्तै सोमबार दुई सय २५ वटा कम्पनीको शेयर कारोबार भएकोमा नौ वटा कम्पनीबाहेक सबै अर्थात् दुई सय १६ वटा कम्पनीको शेयर ओरालो लागेको छ । ११ वटा कम्पनीको शेयर १० प्रतिशतले घटेर नकारात्मक सर्किट लागेको छ । समग्र बजार राताम्मे हुँदा पनि मनकामना स्मार्ट लघुवित्त कम्पनीको शेयर १० प्रतिशतले बढेको छ ।
नेप्से घटे पनि कारोबार रकम भने बिस्तारै बढ्न थालेको छ । सोमबार एक करोड ७३ लाख कित्ता शेयर आठ अर्ब ४९ करोड ३४ लाख रुपैयाँमा कारोबार भएका छन् । सबैभन्दा धेरै अरुण भ्याली हाइड्रोको ४० करोड ३५ लाख रुपैयाँको शेयर किनबेच भएको छ ।