काठमाडौं, ५ माघ : (हिजो) मंगलबार झण्डै ११ अंकले घटेको शेयरबजार परिसूचक नेप्से (आज) बुधबार पनि दोहोरो अंकले ओरालो लागेको छ ।
नेप्से बुधबार ३८ दशमलव ३५ अंकले घटेर दुई हजार आठ सय ९८ दशमलव ३१ विन्दुमा झरेको छ । बुधबार सबै समूहको शेयर घटेकोमा जलविद्युत, होटल, विकास बैंक, उत्पादन र बीमा समूहको शेयर उच्च अंकले ओरालो लागेको छ ।
यस्तै नेप्सेसँगै कारोबार रकम पनि घटेको छ । मंगलबार आठ अर्ब ४४ करोड रुपैयाँको शेयर कारोबार भएकोमा बुधबार ६ अर्ब दुई करोड रुपैयाँमा एक करोड १८ लाख कित्ता शेयर किनबेच भएको छ ।
सबैभन्दा धेरै अपी पावर कम्पनीको २० करोड ३२ लाख रुपैयाँको शेयर किनबेच भयो । घलेम्दी हाइड्रो र कालिका लघुवित्त वित्तीय संस्थाको शेयर चार प्रतिशत भन्दा धेरैले घटेको छ । समग्र बजार घटे पनि बुद्धभूमि नेपाल हाइड्रो र साम्लिङ पावर कम्पनीको शेयर १० प्रतिशतले बढेको छ ।