काठमाडौं, साउन १८ : नेकपा माओवादी केन्द्रको जारी केन्द्रीय समिति बैठकमा केन्द्रीय सदस्यहरुले अध्यक्षको प्रतिवेदनलाई समर्थन गर्दै कार्यान्वयनमा जोड दिएका छन् ।
बैठकको दोश्रो दिनको बैठकमा अध्यक्षको प्रतिवेदनमाथि मुलभुत रुपमा समर्थन गर्दै कार्यान्वयनमा जोड दिएको प्रवक्ता कृष्ण बहादुर महराले जानकारी दिनुभयो ।
उनीहरुले माओवादी नेतृत्वको सरकारले पछिल्लो समयमा गरेका कामहरु राम्रो भएपनि पार्टीलाई अल्मलिएको जस्तो देखिएको धारणा राखेका थिए । त्यस्तै बैठकमा अध्यक्ष प्रचण्डले पार्टीलाई सुधारेर अघि लैजान आफु प्रतिवद्ध रहेको भन्दै यसमा सवैले साथ दिनुपर्ने धारणा राख्नुभएको थियो ।
बिहीबारसम्म ५७ जना सदस्यहरुले धारणा राखेको र धारणा राख्ने क्रम शुक्रबार पनि जारी रहने प्रवक्ता महराले जानकारी दिनुभयो ।
त्यस्तै महराले सुन प्रकरणमा आफ्नो कुनै संलग्नता नरहेको र राजनीतिक प्रभाव देखिएको बताउनुभयो । बैठकमा सदस्यहरूलाई बोल्नका लागि ५ मिनेटको समय उपलब्ध गराइएको छ । बुधबारबाट सुरु बैठक पाँच दिनसम्म चल्ने माओवादी केन्द्रले जनाएको छ ।