काठमाडौं, साउन १९ : राष्ट्रिय स्वतन्त्र पार्टीका सभापति रवि लामिछानेले सुन तस्करी प्रकरणमा शक्तिशाली जाँचबुझ आयोग गठन गर्न आवश्यक देखिएको बताउनुभएको छ ।
सिंहदरबारमा शुक्रबार बसेको प्रतिनिधिसभा अन्तर्गतको राज्य व्यवस्था तथा सुशासन समितिको बैठकमा लामिछानले सुन प्रकरणमा जाँचबुझ आयोग ऐन अनुसार शक्तिशाली आयोग बनाउन आवश्यक देखिएको बताउनुभएको हो ।
उहाले सुन प्रकरणमा संगठीत अपराध, अन्तरदेशीय अपराध समेत देखिएकाले पनि शक्तिशाली आयोग गठन गर्नुपर्ने जिकिर गर्नुभयो । सुन प्रकरण जस्तो ठूलो अपराधमा राज्य व्यवस्था समितिले नजरअन्दाज गर्दा प्रमाण लुक्ने, संदिग्ध भाग्ने सम्भावना दिएको हो की भन्ने आशंका पैदा भएको उहाले बताउनुभयो ।
त्यस्तै कांग्रेस महामन्त्री विश्वप्रकाश शर्माले बल प्रयोगबाट समाधान खोज्ने प्रयास गर्दा सदन अवरुद्ध भएको भन्दै सदनमा सहज रुपमा आवाज उठाउन पाउने वातावरण बनाउनुपर्ने बताउनुभयो । उहाले सुन प्रकरणमा गहिराईमा पुगेर छानविन गर्नुपर्ने माग सहि भएपनि माग राख्ने थलोलाई सहि ढंगले प्रयोग गर्न नसकिएको जिकिर गर्नुभयो । सुन प्रकरणमा मन्त्री र प्रधानमन्त्रीको जवाफ सुन्ने अधिकार सम्पूर्ण सांसदहरुले राख्ने भएकाले सदनमा उक्त अधिकार रक्षा गर्ने सन्दर्भमा राज्य व्यवस्था समितिले बोल्नुपर्ने उहाले बताउनुभयो ।
त्यस्तै एमाले सांसद कृष्णगोपाल श्रेष्ठले हङकङबाट ब्रेशुमा राखेर सुन ल्याउनु आफैमा शंकास्पद देखिएपनि प्रशासनले भने ध्यान दिन नसकेको बताउनुभयो । उहाले सुन प्रकरणमा गृहमन्त्रीको संलग्नता रहेको सुनिएकाले यस प्रकरणमा गहिराईमा पुग्नुपर्ने धारणा राख्नुभयो ।
बैठकमा समितिका ज्येष्ठ सदस्य चित्र बहादुर केसीले राज्यसत्ता नै लुटपाटमा, भ्रष्टाचारमा लागेका कारण अनुसन्धान निष्कर्षमा पुग्ने आशंका उत्पन्न भएको बताउनुभयो ।