काठमाडौं, साउन २६ : नेकपा एमालेका अध्यक्ष केपी शर्मा ओलीले सुन तस्करी प्रकरणमा सरकारमा रहेका व्यक्तिका बिरुद्ध बोलेकै कारण सांसद सुनिल शर्मालाई पक्राउ गर्ने काम भएको बताउनुभएको छ ।
शुक्रबार काठमाडौंमा आयोजित महाकवि विद्यापतिकृत कथासंग्रह पुरुष परीक्षा लोकार्पण समारोहलाई सम्बोधन गर्दै अध्यक्ष ओलील सुन तस्करी प्रकरणमा गृहमन्त्री र अर्थमन्त्रीको राजीनामा माग गरेकै कारण सांसद शर्मालाई पक्राउ गर्ने काम भएको बताउनुभएको हो ।
सुन तस्करी प्रकरणलाई ढाकछोप पर्ने काम राज्यबाटै भएको उहाले बताउनुभयो । अध्यक्ष ओलीले दुई दिन बोलेपछि शर्मालाई पक्राउ गरेर राज्यले सुन तस्करी प्रकरणमा बोल्नेको मुख बन्द गर्ने काम गरेको आरोप लगाउनुभयो ।
त्यस्तै उहाले सदनमा पनि एमालेले सुन प्रकरणमा बोल्छ भनेर सत्तापक्ष सांसदहरुले उठेर विरोध जनाएको र बोल्न निषेध गरेको जिकिर गर्नुभयो । अध्यक्ष ओलीले समाजलाई सफा गर्नका लागि सवैभन्दा पहिला राजनीतिलाई सफा गर्नुपर्ने समेत बताउनुभयो ।