काठमाडौं, १९ भदौं : नेपाली राष्ट्रिय पुरुष तथा महिला भलिबल खेलाडीले मासिक ५ हजार रुपैया तलब पाउने भएका छन् ।
नेपाल भलिवल संघले मंगलबार काठमाडौमा पत्रकार सम्मेलन गरि मासिक पारिश्रमिक उपलब्ध गराउने घोषणा गरेको हो । अमेरिकामा रहेका पूर्व अन्तर्राष्ट्रिय खेलाडी , व्यवसायी र भलिबल खेल प्रेमीको सहयोगमा संघले पहिलो पटक खेलाडीलाई मासिक पारिश्रमिक जनही ५ हजार वितरण गरेको छ ।
महिला तथा पुरुष राष्ट्रिय टिमका १२–१२ गरी २४ जनाले अब मासिक ५–५ हजार पारिश्रमिक पाउने संघले संघका अध्यक्ष जितेन्द्रबहादुर चन्दले जानकारी दिनुभयो । संघले तीन महिनाको एकमुष्ट तलब जनही १५ हजारका दरले खेलाडीलाई वितरण गरेको उहाँले बताउनुभयो ।
संघले यसलाई नेपाली भलिबल इतिहासमै ऐतिहासिक कार्य भएको दाबी गर्दै यसले खेलाडीलाई सहयोग पुग्ने बताएको छ । पहिलो मासिक तलब बुझेपछि खेलाडीहरुले खुसी व्यक्त गरेका छन् । महिला टिमकी कप्तान अरुणा शाहीले पहिलो पटक पारिश्रमिक पाउदा खुशी लागेको बताउनुभयो ।
त्यस्तै पुरुष टिमका कप्तान मानबहादुर श्रेष्ठले नियमित पारिश्रमिक पाउनेकुराले नेपाली भलिवल क्षेत्र थप बलियो हुने विश्वास व्यक्त गर्नुभयो । योसगै खेलाडीलाई तलब दिने भलिबल संघ चौथो संस्था भएको छ । यसअघि क्रिकेट, फुटबल र बुद्धिचालका खेलाडिले मासिक पारिश्रमिक बुझ्दै आएका छन् ।