काठमाडाैं, २१ फागुन । प्रधानमन्त्री पुष्पकमल दाहाल प्रचण्डले बृहतर कम्युनिष्ट एकताको पहल सुरु भएको बताउनुभएको छ ।
सहीद प्रतिष्ठान नेपालले सोमबार काठमाडौंमा आयोजना गरेको शान्ति प्रक्रिया, संघीय लोकतान्त्रिक गणतन्त्र र आजको राजनीति विषयक बृहत अन्तरक्रिया कार्यक्रममा प्रचण्डले बामपन्थीहरुलाई एकठाँउमा ल्याउदै बृहतर कम्युनिष्ट एकताको पहल सुरु भएको बताउनुभएको हो ।
उहाले अहिले नेपाली राजनीतिको निरन्तरतामा क्रम भंग भएको जिकिर गर्नुभयो । प्रतिक्रियावादीले आफुलाई प्रयोग गरे त्यसलाई चिर्न आफुले सक्ने र प्रतिक्रियावादीले भनेजस्तो आफु अविश्वसनिय नभएको उहाले बताउनुभयो । आफुलाई सक्काउन बेला बेलामा धेरै प्रयास हुने गरेको भन्दै प्रचण्डले आफु नमर्दासम्म देशमा उथलपुथल जारी रहने तर्क गर्नुभयो ।
माओवादी अध्यक्ष समेत रहनुभएका प्रचण्डले माओवादी जमेको पोखरीजस्तो नभई निरन्तरतामा रमाउने नदि भएको बताउनुभयो । उहाले सहीदको सपनालाइ साकार पार्दै परिवर्तनलाई संस्थागत गर्न सवै क्रान्तिकारीहरु एक ठाँउमा आउन जरुरी रहेको धारणा राख्नुभयो ।
उहाले आफु नेतृत्वको सरकारले जनयुद्ध दिवसको घोषणा गरेको भन्दै छुटेका सहीदहरुलाई पनि राष्ट्रिय सहीद घोषणा गर्ने क्रममा रहेको बताउनुभयो ।