काठमाडौं, १३ चैत । नेकपा (एमाले)का वरिष्ठ उपाध्यक्ष ईश्वर पोखरेलले कोशी प्रदेशमा नेकपा एमालेको नेतृत्वमा सरकार गठन हुने बताउनुभएको छ ।
प्रेस चौतारी नेपाल उदयपुर शाखाले मङ्गलबार गाईघाटमा आयोजना गरेको पत्रकार भेटघाट कार्यक्रममा पोखरेलले कोशीको नेतृत्व गर्ने बिषयमा अहिलेको सत्तागठबन्धनभित्र सहमति भएको बताउनुभएको हो ।
उहाँले अहिलेको सत्ता गठबन्धनलाई देश बनाउने सपनालाई साकार पार्ने महत्वपूर्ण कामको थालनी भएको र यसलाई जोगाएर अगाडि बढ्नु सत्ता साझेदार दलको अहिलेको आवश्यकता भएको बताउनुभयो ।
उपाध्यक्ष पोखरेलले आर्थिक विकास र समृद्धिको अभियान बिचैमा अलपत्र भएको अवस्थामा अहिलेको सरकार निर्माण गरिएकोले अब देशले राजनीतिक निकास पाउने र विकासले फड्को मार्ने बताउनुभयो ।
नेता पोखरेलले २०८४ सालमा हुने आम निर्वाचनमा नेकपा (एमाले) कुनै दलसँगको गठबन्धन नगरी एक्लै चुनावी मैदानमा जाने र बहुमत ल्याएर एकमना सरकार बनाउने गरी अहिले मिसन २०८४ को लागि आफ्नो सङ्गठन सुदृढीकरण अभियानमा होमिएको बताउनुभयो ।
एउटा गठबन्धन टुटेर अर्काे बनेको अहिलेको यो परिस्थितिमा अहिले नै अर्काे गठबन्धन निर्माण हुने अवस्था नरहेको उहाको भनाइ छ ।