बुटवल । रुपन्देही जिल्ला अदालतले संगठित रुपमा सहकारी ठगी मुद्दामा अनुसन्धानका लागि रवि लामिछानेलाई पक्राउ पुर्जी जारी गरेको छ ।
जिल्ला न्यायधीश श्यामप्रसाद श्रेष्ठको इजलासले कास्की जिल्ला प्रहरीको हिरासतमा रहेका रवि लामिछानेसहित १२ जनाविरुद्ध मंगलबार पक्राउ पुर्जी जारी गरेको हो । इलाका प्रहरी कार्यालय बुटवलको कार्तिक ८ गतेको पत्रअनुसार अदालतले रवि लामिछानेसहित १२ जनालाई पक्राउ पुर्जी जारी गरेको हो ।
सुप्रिम बचत तथा ऋण सहकारी संस्थाको रकम अपचलन सम्बन्धमा बचतकर्ता नारायणबहादुर पहराइको नेपार सरकार वादी भएको मुद्दा अनुसन्धानका लागि रवि सहित १२ जनालाई पक्राउ पूर्जी जारी भएको हो ।
सुप्रिम सहकारीको रकम अपचलनसम्बन्धी मुद्दामा गोर्खा मिडिया नेटवर्कका तत्कालीन उपाध्यक्ष एवं पूर्वडिआईजी छविलाल जोशीलाई मंगलबार सरकारी न्याधिवक्ताको कार्यालयमा बयान लिइ सकिएको छ ।
यस्तै रास्वपाका सभापति एवं पूर्वगृहमन्त्रीसमेत रहिसकेका गोर्खा मिडियाका तत्कालीन प्रबन्ध निर्देशक रवि लामिछाने र गोर्खा मिडियाका तत्कालीन सञ्चालक पूर्वडीआईजी छविलाल जोशीविरुद्ध सम्पत्ति शुद्धीकरण सम्बन्धी कसुरमा पनि अनुसन्धान हुने भएको छ ।
