काठमाडौं, मंसिर २३ : महिला, बालबालिका तथा ज्येष्ठ नागरिक मन्त्री सुरेन्द्र राज आचार्यले सरकारले मात्रै महिलामाथिको बिभेद अन्त्य गर्न नसक्ने बताउनुभएको छ ।
नेपाल प्रेस युनियनले शनिबार काठमाडौंमा आयोजना गरेको समान सहभागीताका लागि सञ्चारकर्मीको भूमिका बिषयक कार्यक्रममा मन्त्री आचार्यले महिलामाथिको बिभेद अन्त्य गर्न समाजमा सचेतना ल्याउनुपर्ने र सरकारले संविधानमा उल्लेख कानून कार्यान्वयनमा जोड दिनुपर्ने बताउनुभयो ।
उहाले संविधानमा उल्लेख समावेशीको बिषयलाई कार्यान्वयनमा लैजान सरोकारवाला सवै गम्भीर हुनुपर्नेमा जोड दिनुभयो ।
मन्त्री आचार्यले निर्वाचनमा पनि दलहरुले समानुपातीक ढंगले महिलाहरुलाई स्थान दिन नसकेको जिकिर गर्नुभयो । उहाले महिला बिभाग खारेज गर्ने निर्णय आफु मन्त्रालय आउनुभन्दा पहिले नै भएको दावी गर्नुभयो । विभाग खारेज भए पनि यसले गर्ने काम अब मन्त्रालयको एउटा शाखाले गर्ने उहाले जानकारी दिनुभयो ।
कार्यक्रममा प्रेस युनियनका अध्यक्ष शिव लम्साल लगाएतले सञ्चारगृहमा महिला सञ्चारकर्मीले सहज रुपमा काम गर्ने वातावरण निर्माण गर्नुपर्ने र अनुगमन निरन्तर हुनुपर्नेमा जोड दिएका थिए ।