धुलिखेल, १३ माघः काभ्रेको पाँचखाल नगरपालिकालाई साक्षर घोषणा गरिएको छ । सोमबार एक कार्यक्रमको आयोजना गरी पालिकालाई साक्षर घोषणा गरिएको हो । नगरमा १६ देखि ६० बर्ष उमेर समूहको साक्षरता ९५.४३ प्रतिशत पुगेकोले साक्षर नगर घोषणा गरिएको पाँचखाल नगरका प्रमुख महेश खरेलले दिए । साक्षर पालिकाको प्रमाणपत्र जिल्ला समन्वय समितिका प्रमुख उद्धव केसीले हस्तान्तरण गरेका थिए ।
जिल्लाको १३ वटा स्थानीय तह मध्ये अब रोशी र चौरी देउराली गाँउपालिका मात्रै साक्षर घोषणा हुन बाँकी छन । यस अघि धुलिखेल, बनेपा, पनौती, नमोबुद्ध, मण्डनदेउपुर नगरपालिका माहाभारत, तेमाल, बेथानचोक, भुम्लु र खानीखोला गाँउपालिका साक्षर घोषणा भईसकेका छन् ।
जिल्लालाई नै माघ २० भित्र साक्षर जिल्ला घोषणा गर्ने तयारी भए पनि सबै पालिका साक्षर नभएकाले पूर्वनिर्धारित योजना अलि पछिसरेको जिल्ला समन्वय समितिका प्रमुख केसीले बताए ।
यसैबीच रोशी गाउँपालिकाले यहि बुधबारभित्र साक्षरता विवरण उपलब्ध गराउन निर्देशन दिएको छ । पालिकाले १६ वटा माध्यामिक विद्यालय, ४ वटा सामुदायिक सिकाई केन्द्र र सबै बालविकास केन्द्रलाई साक्षरता विवरण पठाउन निर्देशन दिएको हो ।