काठमाडौं, ३१ असार : बुधबार सुनको मूल्य अहिलेसम्मकै महङ्गो भएको छ । सुनको मूल्य बुधबार तोलाको ९२ हजार ८ सय रुपैयाँ निर्धारण गरिएको नेपाल सुनचाँदी व्यवसायी महासङ्घले जनाएको छ ।
मंगलबार तोलामा एक सय रुपैयाँ घटेर ९२ हजार २ सय रुपैयाँमा झरेको सुनको मूल्य बुधबार ६ सय रुपैयाँले बढेको हो ।
नेपालमा लकडाउनअघि चैत १० गते तोलाको ७७ हजार रुपैयाँमा कारोबार भएको सुनको मूल्य लकडाउन खुकुलो भएपछि बजार खुलेको पहिलो दिन जेठ २५ गते तोलामा १० हजार ४ सय बढेर तोलाको ८७ हजार ४ सय रुपैयाँमा कारोबार भएको थियो ।
त्यसयता उकालो लागेको सुनको मूल्यले बुधबार रेकर्ड बनाएको छ । यस्तै, चाँदी बुधबार तोलामा १० रुपैयाँ बढेर तोलाको एक हजार ५ रुपैयाँ पुगेको छ । मूल्य महङ्गो हुन थालेपछि कारोबार ठप्पजस्तै भएको व्यवसायीको भनाइ छ ।