काठमाडौं, १३ असोज : प्रधानमन्त्री शेरबहादुर देउवालाई भेट्न नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बालुवाटार पुगेका छन् । पार्टीको स्थायी समिति बैठक बस्नुअघि प्रचण्ड प्रधानमन्त्रीलाई भेट्न बुधबार बिहान बालुवाटार पुगेका हुन् । माओवादी केन्द्रको स्थायी समिति बैठक दिउँसो बस्दैछ ।
त्यसअघि बालुवाटार पुगेका दाहाल र प्रधानमन्त्री देउवाबीच मन्त्रिपरिषदलाई पूर्णता दिनेबारे छलफल भएको बुझिएको छ । गएको आइतबार बसेको सत्ता गठबन्धनको बैठकमा प्रधानमन्त्री देउवाले मन्त्रिपरिषदलाई पूर्णता दिन गठबन्धनका तर्फबाट मन्त्री हुनेहरुको नाम दिन आग्रह गरेका थिए । सत्ता गठबन्धनमा रहेको नेकपा एकीकृत समाजवादी र जनता समाजवादी पार्टीका कारण मन्त्रिपरिषद विस्तारमा ढिलाई हुदै आएको छ ।
आइतबारको बैठकमा दलहरुबीच चाँडै मन्त्रिपरिषद विस्तार गर्ने सहमति बनेपनि उनीहरुले अझै आन्तरिक तयारी गरिनसकेको बालुवाटार स्रोतले जनाएको छ । गठबन्धनमा रहेका जसपा उपेन्द्र यादव उपत्यका बाहिर रहेको र एकीकृत समाजवादीका अध्यक्ष माधव नेपाल केही बिसन्चो भएकाले मंगलबार बस्ने भनेको शीर्ष नेताहरुको बैठक समेत बस्न सकेको छैन ।
गठबन्धनमा रहेका पाँच मध्ये चारवटा पार्टी सरकारमा सहभागी हुने भएपनि उनीहरुबीच कुन कुन मन्त्रालय कसले पाउने भन्ने ठोस सहमति भैसकेको छैन । असार २९ मा प्रधानमन्त्री नियुक्त भएका शेरबहादुर देउवाले कांग्रेसका चार र माओवादी केन्द्रका दुई मन्त्री नियुक्त गरेपनि अझै १८ जना मन्त्री नियुक्त हुन सकेका छैनन् ।