काठमाडौं, ३० पुस : कोरोना भाइरसको संक्रमणसँगै अस्पतालमा संक्रमित बिरामीको संख्या बढ्न थालेको छ ।
अस्पतालमा संक्रमितको संख्या बढे पनि जटिल अवस्थाका बिरामी कम रहेका डाक्टरले बताएका छन् । भर्ना भएका धेरै बिरामीलाई अक्सिजनको आवश्यकता नदेखिएको शुक्रराज ट्रपिकल तथा सरुवा रोग अस्पताल टेकुका निर्देशक डा. मनिषा रावलले बताए ।
उनका अनुसार ६० प्रतिशत बिरामीलाई अक्सिजन आवश्यक परेको छैन । संक्रमितलाई अक्सिजन नचाहिए पनि अस्पतालले अक्सिजन प्लान्ट र तरल अक्सिजन प्लान्ट तयारी अवस्थामा राखेको जनाएको छ ।
टेकुका निर्देशक डा. रावलका अनुसार अस्पतालमा भर्ना भएका १२ मध्ये तीन जनालाई सघन उपचार कक्ष आईसीयूमा अक्सिजन दिइ उपचार गरिएको छ । नौ जनाको हाइ डिपडेन्सी कक्ष एचडीयूमा उपचार भइरहेको छ ।
अस्पतालमा भर्ना हुने धेरैजसोमा घाँटीमा अप्ठ्यारो हुने, नाकबाट पानी बग्ने, शरीर दुख्ने, शरीर तातो हुने, रुघा लाग्नेजस्ता लक्षण देखिएका छन् । टेकु अस्पतालमा सय शय्यासहित २४ आईसीयू रहेको छ ।
अस्पतालका निर्देशक डा. रावलले संक्रमित बढिरहेकाले अबको दुई हप्ता चुनौतीपूर्ण रहेको बताए । यसैगरी बलम्बुको सशस्त्र प्रहरी बल एपीएफ अस्पतालमा पनि संक्रमितको संख्या बढिरहेको छ । अहिले अस्पतालमा ५५ संक्रमितको उपचार भइरहेको छ ।
अस्पतालका डा. प्रविन नेपालले भर्ना भएका धेरै बिरामीलाई अहिले अक्सिजन नचाहिएको बताए । भर्ना भएका १५ प्रतिशत बिरामीलाई मात्र अक्सिजन दिएर उपचार गरिरहेको उनको भनाइ छ । यसअघि संक्रमणको दोस्रो लहरका बेलामा धेरैजसो बिरामीलाई अक्सिजनको आवश्यकता परेको थियो ।
कोभिड-१९ युनिफाइड केन्द्रीय अस्पताल वीरमा बितेको २४ घण्टामा १४ जना बिरामी भर्ना भएका छन् । अस्पतालका प्रमुख डा. भूपेन्द्र बस्नेतले संक्रमण बढेसँगै संक्रमित पनि भर्ना हुन आउने बढेको बताए । उनका अनुसार अहिले ५२ बिरामी अस्पतालमा उपचाररत छन् ।
तीमध्ये नौ जनाको आईसीयूमा उपचार भइरहेको छ । उनका अनुसार अहिलेसम्म भर्ना भएका धेरै बिरामीलाई अक्सिजनको आवश्यकता परेको छैन । अस्पतालमा दैनिक २५० सिलिन्डर अक्सिजन उत्पादन गर्ने प्लान्ट र २० टन क्षमता भएको तरल अक्सिजन प्लान्ट रहेको छ ।
वीर अस्पतालमा पाँच सय शय्यासहित सय शय्याको आईसीयू रहेको छ । स्वास्थ्य तथा जनसङ्ख्या मन्त्रालयका अनुसार नेपालमा अहिले आईसीयू दुई हजार सात सय ९७, भेन्टिलेटर एक हजार आठ, एचडीयू तीन हजार आठ सय ४६ रहेका छन् । यस्तै अक्सिजन सिलिन्डर १३ हजार नै सय ३९, अक्सिजन कन्सटेन्ट्रर ६ सय ९३ रहेका छन् ।